තමන්ගේ දේශපාලන ව්‍යාපෘති වෙනුවෙන් සහ තමන්ට අහිමි වන ව්‍යාපාර බලය යළි අත්පත් කර ගැනීම වෙනුවෙන් ජනතා විමුක්ති පෙරමුණට අවලාද නඟන්න එපා යැයි එක්තරා මාධ්‍ය ආයතනයකට පවසන බව ජනතා විමුක්ති පෙරමුණ පක්ෂයේ නායක අනුර කුමාර දිසානායක මහතා පැවසීය.
මේ පිළිබඳ වැඩිදුරටත් අදහස් දක්වමින් ඒ මහතා මෙසේ ද කීවේය.
සමාජ මාධ්‍ය ජාලාවල වටිනාකම , ඒවායේ වගකීම් විරහිත බව හසුරුවන්නන්ගෙන්ම ඔප්පු වී තිබෙනවා. සමාජ ජාලා වෙබ් අඩවි කිසිදු හරයක් නැති, වටිනාකමක් නැති ප්‍රවෘත්ති නිර්මාණය කරමින් සිටිනවා. අපි ඒවා කිසිසේතම බැරෑරුම් ලෙස සලකන්නෑ. මොකද සමාජ මාධ්‍ය ජාලා කෙරෙහි තිබුණ වටිනාකම සහ බලය එහි ක්‍රියාකාරීත්වය විසින්ම ඒවායේ වටිනාකම , වගකීම අහෝසි කර තිබෙනවා.
නමුත් එක්තරා පුවත්පතක වාර්තාකරණයක් ගැන යම් සැලකිල්ලක් දක්වනා. එම පුවත්පත රටේ පළ කරන බව දන්නේ ඉතා කුඩා ප්‍රමාණයක පිරිසක්. පුවත්පතේ අයිතිකරුවන්ට ඔවුනගේ වියදම හා ආදායම පෙන්නුම් කරන්න පුළුවන් නම් මොන තරම් මුදල් ප්‍රමාණයක් මෙම පුවත්පත පවත්වාගෙන යන්න යොදවනාවා ද යන්න කියන දේ හොයාගන්න පුළුවන්. පුවත්පතේ ආදායම , වියදම රටට එළිදරව් කරන්න කියා මම අභියෝග කරනවා. මේ මාධ්‍ය ආයතන පවත්වාගෙන යන්නේ ඇයි ? ඒවායේ යම් දේශපාලන අරමුණක් තෙබෙනවා. එහි අයිතිකරුවා මාධ්‍ය ජාලා අයිතිකරුවෙක් විය හැකි ද? දේශපාලන සබඳකම් නොමැතිව අපේ රටේ එවැනි ව්‍යාපාර වර්ධනය කළ හැකි ද? පසුගිය දශකයේ අපේ රටේ පාලනය දෙස බැලූ විට ව්‍යාපාර ආරම්භ කිරීමට , කොටස් වෙළඳපොළේ ගනුදෙනු සිදු කිරීමට හැකියාව තිබුණේ දේශපාලන හස්තයන්ගේ සහාය මත පමණයි. ඒනිසා දේශපාලන හස්තයන්ගේ සහාය සහ මැදිහත්වීමක් නැතිව දැවැන්ත සමාගම් සහ මාධ්‍ය ජාලාවන්ගේ කොටස්කරුවන් විය නොහැකි බව ඉතිහාසයේ සාක්ෂි තිබෙනවා.
මේ මුළු මාධ්‍ය ජාලායම යම් දේශපාලන අරමුණක් වෙනුවෙන් මෙහෙය වෙමින් තිබෙනවා.
ඒ පුද්ගලයාට අයත් නාලිකාව සහ ඔහු යම් දේශපාලන ව්‍යාපෘතියක කොටස්කරුවන් බවට පත් වී තිබූ බව පසුගිය කාලයේ දී අපි දැක්කා . මෙම ප්‍රවෘත්ති නිර්මාණය කරන්නේ ඒ දේශපාලන ව්‍යාපෘති වෙනුවෙන්. ත්‍රස්ත ක්‍රියාවලට සම්බන්ධ වූ එක්තරා පුද්ගලයෙක් ජවිපෙට මුදල් වියදම් කළා නම් ඒවා හෙළිදරව් කරන්න කියා මම කියනවා. රටේ මාධ්‍යවේදීන් ඝාතනය කරන විට, මාධ්‍ය ආයතන වලට බෝම්බ ගහන විට, මාධ්‍යවේදීන්ගේ අතපය කඩන විට ඒ මාධ්‍යවේදීන් වෙනුවෙන් අපි පෙනී හිටියා.
මෙම මාධ්‍ය ජාලය ඔහුට ඔහුගේ දේශපාලනය වෙනුවෙන් යොදා ගත්තාට කමක් නැහැ. නමුත් තමන්ගේ දේශපාලන ව්‍යාපෘති වෙනුවෙන්, තමන්ට අහිමි වන ව්‍යාපාර බලය යළි අත්පත් කර ගැනීම වෙනුවෙන්, තමන්ගේ බලය උපයා ගැනීමට යළි දේශපාලන ව්‍යාපෘතිවලට අවතීර්ණවීම වෙනුවෙන් ජනතා විමුක්ති පෙරමුණට අවලාද කරන්න සූදානම් වෙන්න එපා කියා අපි අවධාරණය කරනවා.
ලියන්න, වාර්තා කරන්න අයිතිය තියෙනවා වගේම ඔවුන්ගේ වාර්තාකරණයේ , ඔවුන්ට තොරතුරු සැපයීමේ අසත්‍යබාවයක් තිබෙනවා නම් එය නිවරැදි කරන්න පුළුවන් විය යුතුයි. වාර්තාකරණයේ අයිතිය වාගේම ඒවායේ තිබෙන අසත්‍ය ස්වභාවය නිවරැදි කරදීමත් අපේ අයිතියක්.
නව අදහස දක්වන්න